Александр Шепс амжилт дуудах нууцаасаа хуваалцаж

2 weeks ago admin 0

“Зөн билгийн тулааны” 14 дэх удаагийн оролцогчид болох Мерилин Керро, Александр Шепс хоёр телевизийн шоу нэвтрүүлгээр хайрыг хэрхэн дуудах аргыг хэлж өгсөн юм. Эсрэг хүйстэнтэйгээ хэл үгээ ололцдоггүй асуудалтай, хэн нэгний анхааралд өртөж, хайрлаж хайрлуулах хүсэлтэй хэнд ч энэхүү зөвлөгөө тустай байх нь лавтай.

Долоон хоногийн гаригуудад яаж аз дуудах бэ

“Зөн билгийн тулаанд” бүсгүй хүнтэй ганц удаа ч нухацтай дотно харилцаа үүсгэж чадаагүй 33 настай нэгэн эр тусламж хүсэж хандсан юм. Алексей гэгч тэр эр зоригтой шулуунаар нэвтрүүлэгт хандан одоо хэр зандан яваагаа “зарласан“ юм. Бүр залуу хөвгүүн байхдаа хайртай бүсгүйдээ хууртсанаасаа хойш одоо хүртэл хувийн амьдрал нь нэг л болж бүтэхгүй явна гээд сэтгэлийн гүнээсээ итгэл өвөрлөн зөн билэгтэнгүүдээс тусламж, зөвлөгөө хүссэн юм.
Нэвтрүүлгийн даалгаврыг арай илүү хүндэвтэр болгохын тулд хувийн амьдрал нь хэвийн байгаа өөр хэдэн эрчүүдийг урьж оролцуулсан. Зөн билэгтнүүд эдгээр эрчүүдийн дундаас тэрхүү зандан эрийг олох ёстой байв. Энэ даалгаврыг оролцогчид бараг бүгдээрээ амжилттай хийж гүйцэтгэж чадсан юм. Эстоны удган гэх Мерилин Керро харин алдсан. Гэсэн хэдий ч тэрээр үзэгчдийн санаанд бууж үлдсэн. Алексейн асуудлын тухай олж мэдсэнийхээ дараа тэрээр ягаан өнгийн кварц буюу өөхөн чулууг үргэлж биедээ авч явахыг зөвлөсөн юм. Энэхүү чулуу сэтгэлээ нээн өөртөө итгэлтэй болоход тустайгаас гадна хайр дууддаг гэнэ.
Александр Шепс ч бас тэдгээр эрчүүдийн дундаас ганц удаа эмэгтэй хүнтэй ойртож үзээгүй эрийг олж чадаагүй юм. Гэсэн хэдий ч тэрээр Алексейг одоо хэр зовоосоор байгаа асуудлаа шийдэхэд нь туслахаар шийдэн унтлагын өрөөндөө улаан өнгийн АНАР чулуу хадгалахыг зөвлөв. Чухам энэ чулууг сахиусаа хэмээн шүтвэл хүний сэтгэлд хүсэл, тачаал төрүүлдэг гэж Александр Шепс хэлсэн юм. Улаан өнгийн анар чулуунаас ялгарах энерги хүний дотор сэтгэлийг зөөллөн уярааж, харуусал гуниг гомдлыг нь анагаан, шинэ хайртайгаа учирах эрч хүч энерги өгнө гэнэ. Судалж үзэхэд далд ухаан, ид шидийн тухай ном сударт гагцхүү эдгээр чулууны тухай өгүүлсэн байгаатай нэг бус таарсан. Шинжээчдийн үзэж байгаагаар кварц, анар гэсэн эдгээр чулуунууд хүнд жинхэнээсээ эерэг нөлөө үзүүлж чадахаас гадна хайр дуудаж, бүтэмжтэй байлгадаг нь батлагджээ. Ягаан өнгийн өөхөн чулуу, улаан анар хоёрыг эсрэг хүйстэнтэйгээ бүтэлтэй харилцаанд орж чадахгүй, хувийн амьдралдаа асуудалтай хүмүүс зүүхийг санал болгожээ.

ДОЛОО ХОНОГИЙН ГАРИГУУДАД ХЭРХЭН ЯАЖ АЗ АМЖИЛТ ДУУДАХ ТУХАЙ

Александр Шепс азгүй өдөр гэж байдаггүй, долоо хоногийн аль ч өдөр аз, амжилт дуудаж болно гэж хэлж байна. Харин өөрийнхөө азын тэнгэрийг дуудахын тулд гариг бүрийн өөр өөрийнх нь өвөрмөц онцлогийг мэдэх зайлшгүй шаардлагатай. Ингээд тун энгийн хэдэн ёс жаягийг л гүйцэлдүүлэхэд болоод л явчихна гэнэ. Александр Шепс амжилт дуудах нууцаасаа хуваалцаж: гариг тус бүрийг тодорхой нэг эрхэс гариг удирдаж дагаж мөрдөх өөрийн ёс дүрмийг “тулгадаг” гэнэ.
Даваа гариг бол Сарных бөгөөд энэ өдөр хүмүүс их эмзэг мэдрэмтгий, сэтгэл хөдлөл ихтэй, ааш зан нь хурц байдаг. Хэрвээ энэ өдөр их зүйл шийдэх ямар нэг чухал уулзалт төлөвлөгдсөн бол хүмүүс Сарны нөлөөллөөр “ийм” болсон байгааг тооцоолох хэрэгтэй. Иймд хүссэндээ хүрэхийн тулд илүү амар, чөлөөтэй байдалд ярилцлага явуулах боломжтой. Хэрвээ тухайн хүн өөрийнхөө асуудлын тухай ярих тохиолдолд анхааралтай сонсож, чин сэтгэлээсээ ойлгож мэдрэхийг хичээгээрэй. Даваа гаригт хэн хүнд түүнийг ойлгож сэтгэл санааны дэмжлэг үзүүлэх шаардлагатай байдаг тул зэмлэж шүүмжлэхээс зайлсхийх хэрэгтэй. Иймд аль болох л ойлгож, өөриймсөг хандах шаардлагатай.
Мягмар гаригийг Ангараг удирддаг бөгөөд Александр Шепсийн хэлж байгаагаар: хүмүүс энэ өдөр их уур уцаартай, түрэмгий, хурц ааш араншинтай, гэнэт түргэн дүрсхийх нь олонтой тул мягмар гаригт хэл ам, хэрүүл маргаанаас аль болох зайлсхийх хэрэгтэй. Аливаа шийдвэрлэх үйлдэл, үйл явцад энэ өдөр хамгийн тохиромжтой байдаг. Даргатайгаа албан тушаал ахих тухай ярилцах, хайртай хүндээ сэтгэлээ илчлэх, шийдэмгий байдал шаардсан ямар нэг асуудлыг зохицуулах гэх мэт нэлээд хугацаагаар хойш тавьсан аливаа зүйлийг шийдэхэд хамгийн тохиромжтой байдаг. Өөрийнхөө сэтгэлийн гүнээс итгэл үнэмшилтэйгээр хийсэн бүх юм энэ өдөр амжилттай болж өнгөрдөг. Өөрийнхөө амьдралд ямар нэг өөрчлөлт хийхийг хүсэж байгаа хүнд Мягмар гариг амжилт авчирдаг.
Лхагва гариг. Энэ өдөр Буд гаригийн нөлөөлөл дор сэтгэл санаа тогтворгүйтэх нь элбэг тул чухал уулзалт төлөвлөх нь зохисгүй. Гэрээ хэлэлцээ, аливаа ярилцлага тавьсан зорилго, үр дүндээ хүрэхгүй. Иймд Лхагва гаригт хүмүүстэй чөлөөтэй, албан бус нөхцөлд ярилцахад таатай байх болно. Энэ өдөр эргэн тойрны хүмүүсээсээ ямар нэг амлалт өгөх, үүргээ биелүүлэхийг шаардах хэрэггүй. Заль мэх, овсгоотой, их нийтэч хүмүүсийн талд амжилт байдаг.
Пүрэв гариг. Бархасбадь гаригийн нөлөөгөөр ажил хэрэгч, зүтгэлтэй, хөдөлмөрч, ямар нэг буянтай сайн үйлс хийхээр хичээж чармайж байгаа хүмүүст аз амжилт ирнэ. Иймд энэ өдөр ажлаа хийх, ямар нэг чухал үйл хэргийг эрхлэхэд их тохиромжтой байдаг. Пүрэв гаригт хүмүүстэй харьцахдаа нухацтай, ажил хэрэгч байх шаардлагатай. Энэ өдөр хэл ам, хэрүүл маргаанаас зайлсхийн аливааг энхийн замаар шийдэхийг хичээгээрэй хэмээн зөвлөж байна.
Баасан гариг. Сугар гариг энэ өдрийг захирч хүмүүсийг их эмзэг мэдрэмтгий болгон гоё сайханд тэмүүлэхэд хүргэнэ. Энэ өдөр амжилтанд хүрэхийн тулд эргэн тойрны бүгдэд элэгсэг найрсаг, хүндэтгэлтэй хандахыг хичээгээрэй Эмэгтэй хүнтэй хэл үгээ ололцоход их тохиромжтой. Үүний тулд сэтгэл засаж урам өгөх магтаалын сайхан хэдэн үг хэлэхэд л хангалттай.
Бямба гариг. Санчир гариг бол хүлээх үүрэг, гашуун үнэнийг сануулах тул элдэв бүтэлгүй асуудал, зовлон гашуудлаа ярих нь амьдралыг тань илүү амаргүй болгоно гэлцдэг. Хайртай хүнтэйгээ учир зүйгээ ололцох гэж хичээсэн хүмүүст их таатай өдөр. Бямба гариг элдэв хүсэл, үйлдэлд хязгаар тавьдаг тул чин үнэнээсээ ярьж, илэн далангүй байхыг хичээн, хэн нэгнийг гутаан доромжлохгүй, өөлж шүүмжлэхгүй байхыг эрхэмлээрэй.
Ням гариг. Наранд удирдуулсан Ням гаригт бүтээлч хандлагатай болгох гэж хичээвэл аливаа ажил их амжилттай болж өнгөрнө. Хэрвээ тэдний хувийн өвөрмөц чанар, давуу талыг олж харах анхаарлаа хандуулах тохиолдолд энэ өдөр олноо хүндэтгэгдэн, хүмүүсд хайрлуулж хүлээн зөвшөөрөгдөх боломжтой. Чин сэтгэлээсээ магтаж сайшаах, урам өгөх нь хүнийг өөртөө татах үзэл бодол нэгтэн болгох нэг арга юм. Александр Шепсийн хэлж байгаагаар: дээрх зөвлөгөөг дагаж мөрдөх зуур сахиус зүүлтэндээ ч хүслээ тээгээрэй. Ийм нэгдмэл “үйл ажиллагаа” аливаа бэрхшээл саадыг туулан хүссэн зорилгодоо хүрэхэд тань туслахаас гадна аз, амжилт дуудна.

ИРЭЭДҮЙГЭЭ ЯМАР БАЙХЫГ ХЭРХЭН МЭДЭХ ТУХАЙ

Зөн билэгтэн Александр ирээдүйгээ хэрхэн яаж мэдэх тухай нэгэн ер бусын арга санал болгож байна. Хамгийн гайхалтай нь энэ арга ямар нэг ид шид дээр үндэслэгдээгүй ч илүү үнэн зөв, өөрийнхөө ирээдүйг ойлгож мэдэхэд амар хялбар болгоно. Тэрээр өөрийнхөө ирээдүйн тухай мэдэхийн тулд хэн нэгэн далдыг хардаг хүн, арга засал хийлгэх гэж гүйх шаардлагагүй гэж хэлээд ямар ч хүнтэй ярилцангаа анзаарч ажиглах замаар тухайн хүний тухай ерөнхий дүр зургийг үндсэндээ гаргаж хэлж болно гэж үзэж байна.
Таны төсөөлснөөс ч харьцангуй амар хялбар байгаа биз? Хэн хэзээ ямар хүн болох нь одоо түүний ямар байгаагаас үндсэндээ хамааралтай. Хүний хувь заяанд амьдралын хэв маяг, эрхэлдэг ажил мэргэжил, дадал зуршил, нөхцөл байдал зэрэг нэлээд зүйлээс хамаарна. Гэсэн хэдий ч нөлөөлөх үндсэн хүчин зүйл бол эргэн тойрны хүмүүс юм.
Иймд өөрийнхөө ирээдүйг харахын тулд эргэн тойрны хүмүүсийнхээ байр байдлыг зүгээр харахад л хангалттай. Ялангуяа өөрөөсөө 5-10 насаар ах, эгч хүмүүст илүүтэй анхаарлаа хандуулах хэрэгтэй. Энэ бол хүссэн хүсээгүйгээс үл хамааран өдөр бүр ахуй амьдралын зам дээр уулзаж учирдаг, хамтдаа сурч, ажиллаж, амьдардаг хүмүүс. Энэ бол таны найз нөхөд, хөрш, хамаатан садан, ах дүүс гэр бүлийнхэн, ажлын хамт олон тань байж болно. Тэдний өнөөгийн байр байдлаар өөрийнхөө ирээдүйг тодорхойлох боломжтой.
Хүн бүрд өөрийнх нь ойрын хүрээлэлд байгаа хүмүүс илүү их нөлөөтэй байдаг. Эсрэг зогсох амаргүй. Хэрвээ хүн өөрөөсөө 10 насаар ах ядуу зүдүү, өвчтэй, золгүй нэгэнтэй харьцдаг бол таныг ч мөн 10 жилийн дараа мөн ийм хувь заяа хүлээж мэднэ. Эргэн тойрны энерги хүнийг сэргээн азтай, амжилттай, баян чинээлэг, эсвэл аажим аажмаар ангал уруу унах мэт байдалд оруулна.
Хэрвээ таны ирээдүйг тийм ч таатай бишээр гарахаар хэлж зөвлөсөн бол гарах гарц бас бий. Үүний тулд амьдралдаа хүссэндээ хүрч чадаагүй хэн нэгэнтэй харилцаагаа таслах биш, харин өөрийнхөө харилцааны хүрээг өргөжүүлж, өөрийнхөө ирээдүйг өнөөгийн байгаагаас нь олж харах боломжтой хүмүүстэй танилцаж ойр дөт байхыг хичээгээрэй. Амжилттай хүмүүс амжилтанд өөрийнхөө хүчээр хүрэхийг хүссэн хэнд ч их таатай нөлөө үзүүлж чадна.
Магадгүй энэ бүхний тулд ажлаа өөрчилж, өөр газар луу шилжиж өмнөхөөсөө ирээдүйтэй ажил эрхэлж ч болох юм. Шинэ хүрээлэл шинэ сонин санаа, хүсэл тэмүүлэл, гэрэлт ирээдүйг босгоход шаардлагатай эрч хүч энергийг авч ирнэ.
Дээр дурдсан бүхэн ирээдүйгээ өөрчилж засах боломжтойг харуулж байна. Иймд Александр Шепс: хүн өөрийнхөө ирээдүйг олж харахаас гадна өөрчилж засаж болно. Гагцхүү үүний тулд өөрийнхөө хүрэх зорилгоо их сайн тодорхойлсон, хүсэл мөрөөдөлдөө үнэнч, асар их хичээл зүтгэлтэй байх шаардлагатай гэж хэлж байна. Александр Шепс өөрөө ч хэзээ нэгтээ хүссэнээрээ биш амьдарч, харахыг хүсээгүй хүмүүстэй харьцаж огт өөрөөр амьдарч байгаагаа мэдрээд амьдралаа өөрчлөхөөр шийдсэн гэнэ. Харин тэр таван жилийн тэртээ хүсэж мөрөөдөж байсандаа хүрч, сэтгэлдээ төсөөлсөн тэр хүн болж чадсан.

АМЬДРАЛЫН ЗОРИЛГОО ХЭРХЭН ТОДОРХОЙЛОХ ТУХАЙ
Александр Шепс өөрийнхөө үйлчлүүлэгчдэд зорилгоо хэрхэн яаж тодорхойлох тухай, зорилгодоо хүрэх нэлээд хэдэн аргыг дурдсан байдаг. Цөөн биш хүн өөрийнхөө амьдралыг ямар ч зорилгогүй өнгөрүүлдэг. Магадгүй тэд ямар нэг зүйлийн тухай мөрөөдсөн ч хүсэл мөрөөдлөө биелүүлэхийн тулд хуруугаа ч хөдөлгөх дургүй хүмүүс юм. Александр Шепсийн хэлж байгаагаар энэ хорвоод хүн болж төрсөн бүгдэд өөр өөрийн зорилго заавал байдаг. Хэрвээ хүн зорилгоо олж чадвал өөртөө болон нийгэмд ашиг тустай асар их зүйл бүтээх хувь тохионо. Хамгийн гол нь хүн бүр өөрийнхөө дуртай ажлаа хийж, түүнээсээ таашаал авч энэ амьдралаа туулахыг аз жаргалаа хэмээн үздэг. Өөрийнхөө зорилгоо олохын тулд үзэг цаас аваад дараах асуултанд хариулахыг Александр Шепс санал болгож байна:
• Юу хийх надад хамгийн ихээр таалагддаг вэ?
• Юу надад хамгийн их эрч хүч өгдөг вэ?
• Юу намайг инээж баясахад хүргэдэг вэ?
Асуултанд хариулахдаа ямар нэг үзэгдэл, үйл явдлыг ямар нэг хэмжээгээр дүрслэх хэрэгтэй болно. Чухам эдгээр асуултууд таны хүсэж тэмүүлэх ёстой зорилго уруу зөв замаа олоход тань туслана. Амьдрал хүнд нэг л удаа заяадаг. Иймд ганц олдсон амьдралаа ямар ч таашаал сэтгэл ханамж өгөхгүй ажил хийж, баяр баясгалангүй, хүссэнээрээ амьдарч чадахгүй байна гэдэг үнэхээр тэнэг хэрэг. Александр Шепс өөрийнхөө зорилгоо хэрэгжүүлэх явцдаа хэрхэн яаж амжилтанд хүрэх тухай заавар зөвлөгөө өгсөн юм.
Нэгдүгээрт: Эргэлзээнээсээ салах хэрэгтэй. Хэзээ ч санаж төлөвлөсөн ажил маань хэрэгжих боломжгүй гэсэн бодол тээхгүй байх. Санаа бодол гэдэг биеждэг тул хэрвээ байнга юу ч болж бүтэхгүй гэж бодоод байвал хэзээ ч юу ч биелэж бүтэхгүй.
Хоёрдугаарт: Хийж бүтээж эхлэх хэрэгтэй. Хэрвээ хүн их урт удаан хугацаанд ямар ч зорилгогүй явж ирсэн бол тэрээр хэтэрхий их энергээ алдсан байгаа. Хүний сэтгэлийн их эрч хүч, үйлдэл хөдөлгөөнтэй зохицоод ирэхээр энерги өөрөө гараад ирнэ. Өөрийнхөө зорилгодоо хүрэхгүй байх зөвтгөх учир шалтгааныг эрж хайхгүй байх шаардлагатай. Хэрвээ хийж байгаа ажилдаа энергээ төвлөрүүлж чадвал ямар ч саад бэрхшээл аяндаа үгүй болно. Хүний хийж бүтээх агуу их хүсэл идэвхтэй үйл ажиллагаатай хамтарч хийж бүтээх боломжгүй бүхнийг бодит биелэл болгоно.
Гуравдугаарт: Амжилтандаа итгэж мөрөөдлийнхөө төлөөх тэмцлээ хэзээ ч зогсоохгүй байх. Хүүхэд төрүүлэх, мөнгөтэй болох, бизнес эрхлэх, өөрийн гэсэн ажил нээх гэх мэтчилэн ямар ч зорилго байхаас үл хамааран дөнгөж эхлэнгүүтээ л буюу анхны оролдлогоор бүтэх нь ховор. Хэрвээ ямар нэг зүйл бүтээгүй байсан ч сэтгэлээр унаж хийж байгаагаа бүү орхиорой. Зорилгодоо хүрэхэд тийм ойрхон очсон үедээ өнгөрсөн амьдралаа үргэлжлүүлэх хүсэл төрнө гэж үү? Энэ асуулт магадгүй замын дундаас эргэж буцах гэсэн нэгэнд ухаан хайрлах биз. Александр Шепс өөрөө ч жинхэнэ зорилгоо ухамсарлаж мэдээд тийм удаагүй байгаа тухай нууцаасаа хуваалцсан юм. Тэрээр их урт удаан хугацааг олон янзын зүйл хийж оролдон “өөрийгөө эрж хайсаар” өнгөрүүлсэн. Шепс нэлээд нэртэй ди-жей, фотомодель, түүнчлэн телевизийн хөтлөгч ч байсан юм. Өөрийгөө эрж хайсан өнгөрсөн амьдралдаа жинхэнэ “БИ ХЭН БЭ?” гэдгийгээ олж, хэн байх ёстойгоо мэдэрсэн. Дуртай хүсэж мөрөөдсөн ажил нь түүний хувийн амьдралд хэрэгтэй бүхнийг нь өгчээ.